Refrigerator Tips : ਅੱਜ ਦੇ ਸਮੇਂ ਵਿੱਚ ਫ੍ਰਿਜ ਲਗਭਗ ਹਰ ਘਰ ਅਤੇ ਛੋਟੀਆਂ ਦੁਕਾਨਾਂ ਦੀ ਵੀ ਇੱਕ ਲਾਜ਼ਮੀ ਲੋੜ ਬਣ ਚੁੱਕਾ ਹੈ। ਇਹ ਖਾਣ-ਪੀਣ ਵਾਲੀਆਂ ਚੀਜ਼ਾਂ ਨੂੰ ਲੰਬੇ ਸਮੇਂ ਤੱਕ ਤਾਜ਼ਾ ਰੱਖਣ ਵਿੱਚ ਮਦਦ ਕਰਦਾ ਹੈ ਪਰ ਜੇਕਰ ਇਸਦੀ ਸਹੀ ਤਰੀਕੇ ਨਾਲ ਵਰਤੋਂ ਨਾ ਕੀਤੀ ਜਾਵੇ ਤਾਂ ਬਿਜਲੀ ਦੀ ਖਪਤ ਵੀ ਕਾਫ਼ੀ ਵੱਧ ਸਕਦੀ ਹੈ।
ਕਈ ਲੋਕ ਬਿਨਾਂ ਲੋੜ ਦੇ ਦਿਨ ਭਰ ਫ੍ਰਿਜ ਦਾ ਦਰਵਾਜ਼ਾ ਵਾਰ-ਵਾਰ ਖੋਲ੍ਹਦੇ ਰਹਿੰਦੇ ਹਨ। ਖ਼ਾਸ ਕਰਕੇ ਘਰ ਦੇ ਛੋਟੇ ਬੱਚੇ ਅਜਿਹਾ ਸਭ ਤੋਂ ਵੱਧ ਕਰਦੇ ਹਨ। ਇਸ ਤੋਂ ਇਲਾਵਾ ਕੁਝ ਲੋਕ ਇੱਕ-ਇੱਕ ਕਰਕੇ ਸਮਾਨ ਕੱਢਦੇ ਹਨ, ਜਿਸ ਕਾਰਨ ਫ੍ਰਿਜ ਦਾ ਦਰਵਾਜ਼ਾ ਬਾਰ-ਬਾਰ ਖੁੱਲਦਾ ਅਤੇ ਬੰਦ ਹੁੰਦਾ ਹੈ। ਇਹ ਆਦਤ ਭਾਵੇਂ ਛੋਟੀ ਲੱਗੇ ਪਰ ਇਸ ਦਾ ਸਿੱਧਾ ਅਸਰ ਬਿਜਲੀ ਦੀ ਖਪਤ, ਫ੍ਰਿਜ ਦੀ ਕੂਲਿੰਗ ਅਤੇ ਖਾਣੇ ਦੀ ਗੁਣਵੱਤਾ ‘ਤੇ ਪੈਂਦਾ ਹੈ।
ਆਓ ਜਾਣਦੇ ਹਾਂ ਕਿ ਫ੍ਰਿਜ ਦਾ ਦਰਵਾਜ਼ਾ ਵਾਰ-ਵਾਰ ਖੋਲ੍ਹਣ ਨਾਲ ਬਿਜਲੀ ਦਾ ਬਿੱਲ ਕਿੰਨਾ ਵੱਧ ਸਕਦਾ ਹੈ ਅਤੇ ਇੱਕ ਦਿਨ ਵਿੱਚ ਕਿੰਨੀਆਂ ਯੂਨਿਟ ਬਿਜਲੀ ਵਾਧੂ ਖਰਚ ਹੋ ਸਕਦੀ ਹੈ।
ਫ੍ਰਿਜ ਦਾ ਦਰਵਾਜ਼ਾ ਵਾਰ-ਵਾਰ ਖੋਲ੍ਹਣ ਨਾਲ ਕਿੰਨਾ ਵੱਧਦਾ ਹੈ ਬਿਜਲੀ ਦਾ ਬਿੱਲ?
ਜਦੋਂ ਵੀ ਫ੍ਰਿਜ ਦਾ ਦਰਵਾਜ਼ਾ ਖੁੱਲਦਾ ਹੈ ਤਾਂ ਅੰਦਰ ਦੀ ਠੰਡੀ ਹਵਾ ਬਾਹਰ ਨਿਕਲ ਜਾਂਦੀ ਹੈ ਅਤੇ ਉਸ ਦੀ ਥਾਂ ਗਰਮ ਹਵਾ ਅੰਦਰ ਦਾਖ਼ਲ ਹੋ ਜਾਂਦੀ ਹੈ। ਇਸ ਤੋਂ ਬਾਅਦ ਫ੍ਰਿਜ ਨੂੰ ਮੁੜ ਪਹਿਲਾਂ ਵਾਲੇ ਤਾਪਮਾਨ ‘ਤੇ ਲਿਆਉਣ ਲਈ ਕੰਪ੍ਰੈਸਰ ਨੂੰ ਵੱਧ ਸਮੇਂ ਤੱਕ ਕੰਮ ਕਰਨਾ ਪੈਂਦਾ ਹੈ।
ਮਾਹਿਰਾਂ ਦੇ ਅਨੁਸਾਰ ਫ੍ਰਿਜ ਦਾ ਦਰਵਾਜ਼ਾ ਵਾਰ-ਵਾਰ ਖੋਲ੍ਹਣ ਨਾਲ ਹਰ ਕੂਲਿੰਗ ਸਾਈਕਲ ਦੌਰਾਨ ਬਿਜਲੀ ਦੀ ਖਪਤ ਲਗਭਗ 20 ਫੀਸਦੀ ਤੱਕ ਵੱਧ ਸਕਦੀ ਹੈ। ਜਿੰਨੀ ਵੱਧ ਵਾਰ ਫ੍ਰਿਜ ਖੁੱਲੇਗਾ, ਉਤਨਾ ਹੀ ਵੱਧ ਕੰਪ੍ਰੈਸਰ ਚੱਲੇਗਾ ਅਤੇ ਬਿਜਲੀ ਦਾ ਬਿੱਲ ਵੀ ਵਧੇਗਾ।
ਫ੍ਰਿਜ ਦੀ ਬਿਜਲੀ ਖਪਤ ਕਿਹੜੀਆਂ ਗੱਲਾਂ ‘ਤੇ ਨਿਰਭਰ ਕਰਦੀ ਹੈ?
1. ਫ੍ਰਿਜ ਦਾ ਆਕਾਰ (ਸਾਈਜ਼): ਵੱਡੇ ਆਕਾਰ ਵਾਲੇ ਫ੍ਰਿਜ ਨੂੰ ਠੰਢਾ ਰੱਖਣ ਲਈ ਜ਼ਿਆਦਾ ਬਿਜਲੀ ਦੀ ਲੋੜ ਪੈਂਦੀ ਹੈ।
2. ਤਾਪਮਾਨ ਸੈਟਿੰਗ : ਜੇਕਰ ਫ੍ਰਿਜ ਦਾ ਤਾਪਮਾਨ ਲੋੜ ਤੋਂ ਵੱਧ ਘੱਟ ਰੱਖਿਆ ਜਾਵੇ ਤਾਂ ਬਿਜਲੀ ਦੀ ਖਪਤ ਵੱਧ ਜਾਂਦੀ ਹੈ।
3. ਦਰਵਾਜ਼ਾ ਵਾਰ-ਵਾਰ ਖੋਲ੍ਹਣਾ: ਹਰ ਵਾਰ ਦਰਵਾਜ਼ਾ ਖੁੱਲਣ ਨਾਲ ਗਰਮ ਹਵਾ ਅੰਦਰ ਜਾਂਦੀ ਹੈ ਅਤੇ ਕੰਪ੍ਰੈਸਰ ਨੂੰ ਵੱਧ ਸਮੇਂ ਤੱਕ ਚੱਲਣਾ ਪੈਂਦਾ ਹੈ।
4. ਕਮਰੇ ਦਾ ਤਾਪਮਾਨ : ਜੇਕਰ ਫ੍ਰਿਜ ਨੂੰ ਬਹੁਤ ਗਰਮ ਥਾਂ ‘ਤੇ ਰੱਖਿਆ ਗਿਆ ਹੋਵੇ ਤਾਂ ਇਸ ਨੂੰ ਠੰਢਾ ਰੱਖਣ ਲਈ ਵੱਧ ਬਿਜਲੀ ਲੱਗਦੀ ਹੈ।
5. ਫ੍ਰਿਜ ਵਿੱਚ ਲੋੜ ਤੋਂ ਵੱਧ ਸਮਾਨ ਭਰਨਾ: ਬਹੁਤ ਜ਼ਿਆਦਾ ਸਮਾਨ ਰੱਖਣ ਨਾਲ ਹਵਾ ਦਾ ਪ੍ਰਵਾਹ ਘੱਟ ਹੋ ਜਾਂਦਾ ਹੈ, ਜਿਸ ਕਾਰਨ ਫ੍ਰਿਜ ਨੂੰ ਠੰਢਾ ਰੱਖਣ ਲਈ ਵੱਧ ਬਿਜਲੀ ਦੀ ਲੋੜ ਪੈਂਦੀ ਹੈ।
6. ਸਹੀ ਦੇਖਭਾਲ (ਮੇਨਟੇਨੈਂਸ) : ਜੇਕਰ ਫ੍ਰਿਜ ਦੀ ਕੌਇਲ ਜਾਂ ਡੋਰ ਸੀਲ ਸਾਫ਼ ਨਾ ਹੋਵੇ ਜਾਂ ਖਰਾਬ ਹੋਵੇ ਤਾਂ ਵੀ ਬਿਜਲੀ ਦੀ ਖਪਤ ਵੱਧ ਸਕਦੀ ਹੈ।
ਇੱਕ ਦਿਨ ਵਿੱਚ ਕਿੰਨੀਆਂ ਯੂਨਿਟ ਬਿਜਲੀ ਖਰਚ ਹੁੰਦੀ ਹੈ?
ਫ੍ਰਿਜ ਦੀ ਬਿਜਲੀ ਖਪਤ ਉਸਦੇ ਆਕਾਰ, ਸਟਾਰ ਰੇਟਿੰਗ, ਵਰਤੋਂ ਦੇ ਤਰੀਕੇ ਅਤੇ ਕਮਰੇ ਦੇ ਤਾਪਮਾਨ ‘ਤੇ ਨਿਰਭਰ ਕਰਦੀ ਹੈ। ਆਮ ਤੌਰ ‘ਤੇ ਇੱਕ ਘਰੇਲੂ ਫ੍ਰਿਜ ਰੋਜ਼ਾਨਾ 1 ਤੋਂ 2 ਯੂਨਿਟ (kWh) ਬਿਜਲੀ ਦੀ ਖਪਤ ਕਰਦਾ ਹੈ। ਔਸਤਨ ਇਹ 1.2 ਯੂਨਿਟ ਪ੍ਰਤੀ ਦਿਨ, 36 ਯੂਨਿਟ ਪ੍ਰਤੀ ਮਹੀਨਾ ਅਤੇ ਲਗਭਗ 438 ਯੂਨਿਟ ਪ੍ਰਤੀ ਸਾਲ ਬਿਜਲੀ ਵਰਤਦਾ ਹੈ। ਜੇਕਰ ਫ੍ਰਿਜ ਦਾ ਦਰਵਾਜ਼ਾ ਵਾਰ-ਵਾਰ ਖੋਲ੍ਹਿਆ ਜਾਵੇ, ਉਸ ਵਿੱਚ ਲੋੜ ਤੋਂ ਵੱਧ ਸਮਾਨ ਭਰਿਆ ਜਾਵੇ ਜਾਂ ਉਸ ਨੂੰ ਗਰਮ ਥਾਂ ‘ਤੇ ਰੱਖਿਆ ਜਾਵੇ ਤਾਂ ਬਿਜਲੀ ਦੀ ਖਪਤ ਹੋਰ ਵੀ ਵੱਧ ਸਕਦੀ ਹੈ। ਇਸਦੇ ਉਲਟ 5-ਸਟਾਰ ਰੇਟਿੰਗ ਵਾਲੇ ਫ੍ਰਿਜ ਘੱਟ ਬਿਜਲੀ ਵਰਤਦੇ ਹਨ, ਜਿਸ ਨਾਲ ਲੰਬੇ ਸਮੇਂ ਵਿੱਚ ਬਿਜਲੀ ਦਾ ਬਿੱਲ ਘੱਟ ਆਉਂਦਾ ਹੈ।
