Delhi Hotel Fire : ਦਿੱਲੀ ਦੇ ਮਾਲਵੀਆ ਨਗਰ ਵਿੱਚ ਸਥਿਤ ਲੇਮਨ ਗ੍ਰੀਨ ਨਾਮਕ ਹੋਟਲ ਭਿਆਨਕ ਅੱਗ ਦੀ ਲਪੇਟ ਵਿੱਚ ਆ ਕੇ ਸੜ ਕੇ ਸੁਆਹ ਹੋ ਗਿਆ। ਇਸ ਦਰਦਨਾਕ ਹਾਦਸੇ ਵਿੱਚ 21 ਲੋਕ ਜ਼ਿੰਦਾ ਸੜ ਗਏ। 21 ਲੋਕਾਂ ਦੀ ਮੌਤ ਨੇ ਪੂਰੀ ਦਿੱਲੀ ਨੂੰ ਝੰਝੋੜ ਕੇ ਰੱਖ ਦਿੱਤਾ ਹੈ। ਇਸ ਦੌਰਾਨ ਚਸ਼ਮਦੀਦਾਂ ਵੱਲੋਂ ਬਿਆਨ ਕੀਤੇ ਮੰਜ਼ਰ ਸੁਣ ਕੇ ਕਿਸੇ ਦੀ ਵੀ ਰੂਹ ਕੰਬ ਜਾਵੇ।
ਮੌਕੇ ‘ਤੇ ਮੌਜੂਦ ਓਮ ਨਾਮਕ ਵਿਅਕਤੀ ਨੇ ਦੱਸਿਆ, “ਸਵੇਰੇ ਕਰੀਬ 9:30 ਵਜੇ ਮੈਂ ਆਪਣੇ ਦੋਸਤ ਨਾਲ ਸਕੂਟੀ ‘ਤੇ ਜਾ ਰਿਹਾ ਸੀ। ਅਸੀਂ ਵੇਖਿਆ ਕਿ ਇਸ ਇਮਾਰਤ ਨੂੰ ਪੂਰੀ ਤਰ੍ਹਾਂ ਅੱਗ ਲੱਗੀ ਹੋਈ ਸੀ ਅਤੇ ਲੋਕ ਆਪਣੀ ਜਾਨ ਬਚਾਉਣ ਲਈ ਉੱਪਰੋਂ ਛਾਲਾਂ ਮਾਰ ਰਹੇ ਸਨ। ਮੈਂ ਕਰੀਬ 4-5 ਲੋਕਾਂ ਨੂੰ ਖਿੜਕੀਆਂ ਦੇ ਸ਼ੀਸ਼ੇ ਤੋੜ ਕੇ ਹੇਠਾਂ ਕੂਦਦੇ ਦੇਖਿਆ। ਇੱਕ ਵਿਅਕਤੀ ਜਦੋਂ ਹੇਠਾਂ ਡਿੱਗਿਆ ਤਾਂ ਉਸ ਦੀ ਲੱਤ ਬੁਰੀ ਤਰ੍ਹਾਂ ਟੁੱਟ ਗਈ। ਕੁਝ ਹੀ ਸਮੇਂ ਵਿੱਚ ਫਾਇਰ ਬ੍ਰਿਗੇਡ ਦੀਆਂ ਗੱਡੀਆਂ ਪਹੁੰਚ ਗਈਆਂ, ਪੂਰਾ ਇਲਾਕਾ ਸੀਲ ਕਰ ਦਿੱਤਾ ਗਿਆ ਅਤੇ ਲੋਕਾਂ ਦੀ ਭਾਰੀ ਭੀੜ ਇਕੱਠੀ ਹੋ ਗਈ।”
ਛੋਟੇ ਬੱਚੇ ਨੂੰ ਲੈ ਕੇ ਤੀਜੀ ਮੰਜ਼ਿਲ ਤੋਂ ਕੂਦੀ ਮਹਿਲਾ, ਲੱਤ ਹੋਈ ਫ੍ਰੈਕਚਰ
ਇੱਕ ਹੋਰ ਚਸ਼ਮਦੀਦ ਸ਼ੇਰ ਖਾਨ ਨੇ ਦੱਸਿਆ ਕਿ ਉਹ ਆਪਣੀ ਦੁਕਾਨ ਵੱਲ ਜਾ ਰਹੇ ਸਨ ਜਦੋਂ ਉਨ੍ਹਾਂ ਨੇ ਦੇਖਿਆ ਕਿ ਇਮਾਰਤ ਵਿੱਚ ਅੱਗ ਲੱਗੀ ਹੋਈ ਸੀ। ਸਮੇਂ ਦੇ ਨਾਲ ਅੱਗ ਹੋਰ ਭਿਆਨਕ ਹੁੰਦੀ ਗਈ। ਇਮਾਰਤ ਵਿੱਚ ਫਸੇ ਲੋਕਾਂ ਲਈ ਬਾਹਰ ਨਿਕਲਣ ਦਾ ਕੋਈ ਰਸਤਾ ਨਹੀਂ ਬਚਿਆ ਸੀ।
ਉਨ੍ਹਾਂ ਦੱਸਿਆ ਕਿ ਲੋਕਾਂ ਨੇ ਹੇਠਾਂ ਸੜਕ ‘ਤੇ ਗੱਦੇ ਵਿਛਾਉਣੇ ਸ਼ੁਰੂ ਕਰ ਦਿੱਤੇ। ਇਸ ਦੌਰਾਨ ਇੱਕ ਮਹਿਲਾ ਆਪਣੇ ਛੋਟੇ ਬੱਚੇ ਨੂੰ ਚੁੱਕ ਕੇ ਤੀਜੀ ਮੰਜ਼ਿਲ ਤੋਂ ਹੇਠਾਂ ਕੂਦ ਗਈ, ਜਿਸ ਕਾਰਨ ਉਸ ਦੀ ਲੱਤ ਫ੍ਰੈਕਚਰ ਹੋ ਗਈ। ਮਹਿਲਾ ਖੁਦ ਕਹਿ ਰਹੀ ਸੀ ਕਿ ਉਸ ਦੀ ਲੱਤ ਟੁੱਟ ਚੁੱਕੀ ਹੈ। ਇਸ ਤੋਂ ਬਾਅਦ ਕਈ ਹੋਰ ਲੋਕ ਵੀ ਇੱਕ-ਇੱਕ ਕਰਕੇ ਜਾਨ ਬਚਾਉਣ ਲਈ ਉੱਪਰੋਂ ਛਾਲਾਂ ਮਾਰਦੇ ਰਹੇ ਅਤੇ ਹਾਲਾਤ ਹੋਰ ਵੀ ਗੰਭੀਰ ਬਣਦੇ ਗਏ।
ਹੋਰ ਪੜ੍ਹੋ
