Communication In Relationships : ਵਿਆਹ ਨੂੰ ਜ਼ਿੰਦਗੀ ਦਾ ਸਭ ਤੋਂ ਮਜ਼ਬੂਤ ਰਿਸ਼ਤਾ ਮੰਨਿਆ ਜਾਂਦਾ ਹੈ, ਪਰ ਹਰ ਰਿਸ਼ਤਾ ਹਮੇਸ਼ਾ ਇੱਕੋ ਜਿਹਾ ਨਹੀਂ ਰਹਿੰਦਾ। ਸਮੇਂ ਦੇ ਨਾਲ ਲੋਕਾਂ ਦੀ ਸੋਚ, ਲੋੜਾਂ ਅਤੇ ਭਾਵਨਾਵਾਂ ਬਦਲਦੀਆਂ ਹਨ ਅਤੇ ਕਈ ਵਾਰ ਇਹ ਬਦਲਾਅ ਹੀ ਰਿਸ਼ਤਿਆਂ ਵਿੱਚ ਦੂਰੀ ਦਾ ਕਾਰਨ ਬਣ ਜਾਂਦੇ ਹਨ। ਪਿਛਲੇ ਕੁਝ ਸਾਲਾਂ ਵਿੱਚ ਤਲਾਕ ਦੇ ਵੱਧ ਰਹੇ ਮਾਮਲਿਆਂ ਨੇ ਇਹ ਸਵਾਲ ਖੜ੍ਹਾ ਕੀਤਾ ਹੈ ਕਿ ਆਖਿਰ ਵਿਆਹ ਦੇ ਕਿਹੜੇ ਸਾਲ ਰਿਸ਼ਤੇ ਲਈ ਸਭ ਤੋਂ ਮੁਸ਼ਕਲ ਸਾਬਤ ਹੁੰਦੇ ਹਨ।
ਕਿਹੜੇ ਸਾਲਾਂ ਵਿੱਚ ਤਲਾਕ ਦਾ ਖਤਰਾ ਸਭ ਤੋਂ ਵੱਧ ਹੁੰਦਾ ਹੈ?
ਰਿਲੇਸ਼ਨਸ਼ਿਪ ਨਾਲ ਜੁੜੀ ਜਾਣਕਾਰੀ ਦੇਣ ਵਾਲੀ ਵੈੱਬਸਾਈਟ Marriage.com ਮੁਤਾਬਕ ਵਿਆਹ ਦੇ ਪਹਿਲੇ ਦੋ ਸਾਲਾਂ ਅਤੇ ਫਿਰ ਪੰਜਵੇਂ ਤੋਂ ਅੱਠਵੇਂ ਸਾਲ ਦੇ ਵਿਚਕਾਰ ਤਲਾਕ ਦਾ ਖਤਰਾ ਸਭ ਤੋਂ ਵੱਧ ਦੇਖਿਆ ਜਾਂਦਾ ਹੈ।
ਰਿਸਰਚ ਵਿੱਚ ਇਹ ਵੀ ਸਾਹਮਣੇ ਆਇਆ ਹੈ ਕਿ ਵਿਆਹ ਦਾ ਸੱਤਵਾਂ ਅਤੇ ਅੱਠਵਾਂ ਸਾਲ ਰਿਸ਼ਤਿਆਂ ਲਈ ਸਭ ਤੋਂ ਚੁਣੌਤੀਪੂਰਨ ਮੰਨਿਆ ਜਾਂਦਾ ਹੈ। ਕਈ ਮਾਹਿਰ ਇਸ ਨੂੰ “Seven-Year Itch” ਨਾਲ ਜੋੜਦੇ ਹਨ। ਇਸ ਥਿਊਰੀ ਮੁਤਾਬਕ ਵਿਆਹ ਦੇ ਲਗਭਗ ਸੱਤ ਸਾਲ ਬਾਅਦ ਕਈ ਜੋੜਿਆਂ ਦੇ ਰਿਸ਼ਤੇ ਵਿੱਚ ਪਹਿਲਾਂ ਵਰਗੀ ਦਿਲਚਸਪੀ ਘਟਣ ਲੱਗਦੀ ਹੈ। ਹਾਲਾਂਕਿ ਇਹ ਥਿਊਰੀ ਪੂਰੀ ਤਰ੍ਹਾਂ ਸਾਬਤ ਨਹੀਂ ਹੋਈ ਪਰ ਕਈ ਅਧਿਐਨਾਂ ਅਤੇ ਅੰਕੜਿਆਂ ਵਿੱਚ ਸੱਤਵੇਂ-ਅੱਠਵੇਂ ਸਾਲ ਦੌਰਾਨ ਤਲਾਕ ਦੇ ਮਾਮਲਿਆਂ ਵਿੱਚ ਵਾਧਾ ਦੇਖਿਆ ਗਿਆ ਹੈ।
ਰਿਸ਼ਤਿਆਂ ਵਿੱਚ ਠਹਿਰਾਅ ਕਦੋਂ ਆਉਂਦਾ ਹੈ?
ਅਧਿਐਨ ਅਨੁਸਾਰ ਜੋ ਜੋੜੇ ਇਸ ਮੁਸ਼ਕਲ ਦੌਰ ਨੂੰ ਪਾਰ ਕਰ ਲੈਂਦੇ ਹਨ, ਉਨ੍ਹਾਂ ਵਿੱਚ ਅਗਲੇ ਕੁਝ ਸਾਲਾਂ ਤੱਕ ਤਲਾਕ ਦਾ ਖਤਰਾ ਘੱਟ ਹੋ ਜਾਂਦਾ ਹੈ। ਵਿਆਹ ਦੇ 9ਵੇਂ ਤੋਂ 15ਵੇਂ ਸਾਲ ਦੇ ਵਿਚਕਾਰ ਕਈ ਜੋੜੇ ਆਪਣੇ ਰਿਸ਼ਤੇ ਵਿੱਚ ਵਧੇਰੇ ਸਥਿਰਤਾ ਅਤੇ ਸਮਝ ਮਹਿਸੂਸ ਕਰਦੇ ਹਨ। ਮਾਹਿਰਾਂ ਦਾ ਮੰਨਣਾ ਹੈ ਕਿ ਇਸ ਸਮੇਂ ਤੱਕ ਲੋਕ ਆਪਣੇ ਜੀਵਨ ਸਾਥੀ, ਬੱਚਿਆਂ, ਕਰੀਅਰ ਅਤੇ ਪਰਿਵਾਰਕ ਜ਼ਿੰਮੇਵਾਰੀਆਂ ਨਾਲ ਬਿਹਤਰ ਤਾਲਮੇਲ ਬਣਾ ਲੈਂਦੇ ਹਨ।
ਰਿਸ਼ਤਿਆਂ ਵਿੱਚ ਦਰਾਰ ਕਿਉਂ ਆਉਂਦੀ ਹੈ?
ਰਿਸ਼ਤਿਆਂ ਵਿੱਚ ਦੂਰੀ ਜਾਂ ਤਲਾਕ ਦੇ ਪਿੱਛੇ ਕੋਈ ਇੱਕ ਕਾਰਨ ਨਹੀਂ ਹੁੰਦਾ। ਮਾਹਿਰਾਂ ਮੁਤਾਬਕ, ਆਰਥਿਕ ਤਣਾਅ ਤਲਾਕ ਦੀਆਂ ਸਭ ਤੋਂ ਵੱਡੀਆਂ ਵਜ੍ਹਾਂ ਵਿੱਚੋਂ ਇੱਕ ਹੈ। ਪੈਸਿਆਂ ਦੀ ਕਮੀ, ਕਰਜ਼ਾ ਜਾਂ ਨੌਕਰੀ ਚਲੇ ਜਾਣ ਵਰਗੀਆਂ ਸਥਿਤੀਆਂ ਰਿਸ਼ਤਿਆਂ ‘ਤੇ ਭਾਰੀ ਦਬਾਅ ਪਾ ਸਕਦੀਆਂ ਹਨ।
ਇਸ ਤੋਂ ਇਲਾਵਾ ਸਮੇਂ ਦੇ ਨਾਲ ਭਵਿੱਖ ਨੂੰ ਲੈ ਕੇ ਸੋਚ ਵਿੱਚ ਬਦਲਾਅ ਵੀ ਰਿਸ਼ਤਿਆਂ ਵਿੱਚ ਦੂਰੀ ਪੈਦਾ ਕਰ ਸਕਦਾ ਹੈ। ਕਈ ਵਾਰ ਵਿਆਹ ਦੇ ਕੁਝ ਸਾਲਾਂ ਬਾਅਦ ਪਤੀ-ਪਤਨੀ ਦੇ ਕਰੀਅਰ, ਪਰਿਵਾਰ ਜਾਂ ਜੀਵਨ ਦੇ ਟੀਚਿਆਂ ਨੂੰ ਲੈ ਕੇ ਵਿਚਾਰ ਵੱਖਰੇ ਹੋ ਜਾਂਦੇ ਹਨ, ਜਿਸ ਨਾਲ ਟਕਰਾਅ ਵੱਧ ਸਕਦਾ ਹੈ।
ਮਾਹਿਰਾਂ ਅਨੁਸਾਰ ਬੇਵਫ਼ਾਈ, ਪਰਿਵਾਰ ਨਾਲ ਖਰਾਬ ਸੰਬੰਧ, ਘਰੇਲੂ ਹਿੰਸਾ ਅਤੇ ਭਾਵਨਾਤਮਕ ਸਹਿਯੋਗ ਦੀ ਕਮੀ ਵੀ ਤਲਾਕ ਦੇ ਵੱਡੇ ਕਾਰਨ ਹਨ। ਇਸ ਦੇ ਨਾਲ ਹੀ ਘੱਟ ਉਮਰ ਵਿੱਚ ਵਿਆਹ ਕਰਨਾ ਅਤੇ ਜਲਦੀ ਮਾਤਾ-ਪਿਤਾ ਬਣ ਜਾਣਾ ਵੀ ਕਈ ਜੋੜਿਆਂ ਲਈ ਰਿਸ਼ਤਾ ਨਿਭਾਉਣਾ ਮੁਸ਼ਕਲ ਬਣਾ ਸਕਦਾ ਹੈ।
ਹੋਰ ਪੜ੍ਹੋ
