Ravneet Bittu : ਕੇਂਦਰੀ ਰਾਜ ਮੰਤਰੀ ਰਵਨੀਤ ਸਿੰਘ ਬਿੱਟੂ ਨੇ ਅੱਜ ਪੰਜਾਬੀ ਗਾਇਕ ਅਤੇ ਅਦਾਕਾਰ ਦਿਲਜੀਤ ਦੋਸਾਂਝ ‘ਤੇ ਸਿੱਧਾ ਹਮਲਾ ਬੋਲਿਆ। ਜਸਵੰਤ ਸਿੰਘ ਖਾਲੜਾ ‘ਤੇ ਆਧਾਰਿਤ ਬਣੀ ਫ਼ਿਲਮ ਅਤੇ OTT ਵਿਵਾਦ ਨੂੰ ਲੈ ਕੇ ਬੋਲਦਿਆਂ ਬਿੱਟੂ ਨੇ ਦਿਲਜੀਤ ਨੂੰ “ਬਹੁਰੂਪੀਆ” ਅਤੇ “ਪੈਸਿਆਂ ਦਾ ਲਾਲਚੀ” ਕਰਾਰ ਦਿੱਤਾ।
ਲੁਧਿਆਣਾ ਦੇ ਨਿੱਜੀ ਦੌਰੇ ਦੌਰਾਨ ਬਿੱਟੂ ਨੇ ਕਿਹਾ ਕਿ ਇਹ ਫ਼ਿਲਮ ਨਾ ਤਾਂ ਸਿੱਖ ਪੰਥ ਦੀ ਸੇਵਾ ਹੈ ਅਤੇ ਨਾ ਹੀ ਪੰਜਾਬ ਦੇ ਦਰਦ ਨੂੰ ਸਾਹਮਣੇ ਲਿਆਉਣ ਦੀ ਕੋਸ਼ਿਸ਼, ਸਗੋਂ ਕਰੋੜਾਂ ਰੁਪਏ ਕਮਾਉਣ ਲਈ ਸੋਚੀ-ਸਮਝੀ ਸਕ੍ਰਿਪਟ ਅਤੇ ਪਬਲਿਸਿਟੀ ਸਟੰਟ ਹੈ। ਉਨ੍ਹਾਂ ਨੇ ਆਪਣੇ ਬਿਆਨ ਵਿੱਚ ਫ਼ਿਲਮ ਚਮਕੀਲਾ, 1984 ਦੇ ਸਿੱਖ ਕਤਲੇਆਮ ਅਤੇ ਅਮਿਤਾਭ ਬੱਚਨ ਦਾ ਜ਼ਿਕਰ ਕਰਦੇ ਹੋਏ ਦਿਲਜੀਤ ਨੂੰ ਘੇਰਿਆ।
ਰਵਨੀਤ ਬਿੱਟੂ ਦੇ ਦਿਲਜੀਤ ਦੋਸਾਂਝ ‘ਤੇ ਤਿੱਖੇ ਤੰਜ
“ਤੂੰ ਬਹੁਰੂਪੀਆ ਹੈਂ, ਜਿੱਥੇ ਪੈਸਾ ਦਿਖਦਾ ਉੱਥੇ ਚੱਲ ਪੈਂਦਾ ਹੈਂ”
ਬਿੱਟੂ ਨੇ ਕਿਹਾ, “ਵਿਦੇਸ਼ਾਂ ਵਿੱਚ ਤੂੰ ਉਹਨਾਂ ਲੋਕਾਂ ਨੂੰ ਬਾਹਰ ਕੱਢਣ ਦੀ ਗੱਲ ਕਰਦਾ ਹੈਂ ਜੋ ਖਾਲਿਸਤਾਨ ਦੇ ਝੰਡੇ ਲੈ ਕੇ ਆਉਂਦੇ ਹਨ। ਤੂੰ ਹੈਂ ਕੀ? ਤੂੰ ਹਰ ਪਾਸੇ ਤੋਂ ਬਹੁਰੂਪੀਆ ਹੈਂ। ਜਿੱਥੇ ਤੈਨੂੰ ਪੈਸਾ ਦਿਖਦਾ ਹੈ, ਤੇਰਾ ਝੋਲਾ ਉੱਥੇ ਹੀ ਚੱਲ ਪੈਂਦਾ ਹੈ।”
ਅਮਿਤਾਭ ਬੱਚਨ ਦੇ ਪੈਰ ਛੂਹਣ ‘ਤੇ ਨਿਸ਼ਾਨਾ
ਬਿੱਟੂ ਨੇ ਕਿਹਾ, “ਜਿਸ ਅਮਿਤਾਭ ਬੱਚਨ ਨੇ 1984 ਵਿੱਚ (ਰਾਜੀਵ ਗਾਂਧੀ ਦੇ ਦੋਸਤ ਹੋਣ ਦੇ ਨਾਤੇ) ਸਿੱਖਾਂ ਦਾ ਸਭ ਤੋਂ ਵੱਡਾ ਕਤਲੇਆਮ ਕਰਵਾਇਆ, ਉਸੇ ਦੇ ਪੈਰਾਂ ਵਿੱਚ ਦਿਲਜੀਤ ਜਾ ਕੇ ਝੁਕਦਾ ਹੈ। ਅੱਜ ਉਹੀ ਸਿੱਖਾਂ ਦੇ ਦਰਦ ਦੀ ਗੱਲ ਕਰ ਰਿਹਾ ਹੈ।”
“ਮਹਿਲਾਂ ਵਿੱਚ ਬੈਠ ਕੇ ਪੰਜਾਬ ਦਾ ਦਰਦ ਬਿਆਨ ਕਰ ਰਿਹਾ ਹੈ”
ਬਿੱਟੂ ਨੇ ਕਿਹਾ, “ਇਸ ਨੂੰ ਕੀ ਦਰਦ ਹੈ? ਵਿਦੇਸ਼ਾਂ ਦੇ ਵੱਡੇ-ਵੱਡੇ ਮਹਲਾਂ ਵਿੱਚ ਬੈਠ ਕੇ ਆਰਾਮ ਕਰ ਰਿਹਾ ਹੈ। ਜਦੋਂ ਖਾਲੜਾ ਸਾਹਿਬ ਸੰਘਰਸ਼ ਕਰ ਰਹੇ ਸਨ, ਇਹ ਕਿੱਥੇ ਸੀ? ਇਸ ਦਾ ਸਾਰਾ ਪਰਿਵਾਰ ਸਰਕਾਰੀ ਨੌਕਰੀਆਂ ਕਰਦਾ ਸੀ ਅਤੇ ਸਰਕਾਰ ਦੀਆਂ ਸਹੂਲਤਾਂ ਲੈਂਦਾ ਸੀ, ਅੱਜ ਇਹ ਪੰਜਾਬ ਦੇ ਦਰਦ ਦੀਆਂ ਗੱਲਾਂ ਕਰ ਰਿਹਾ ਹੈ।”
‘ਚਮਕੀਲਾ’ ਅਤੇ “ਗੰਦੇ ਗੀਤਾਂ” ਦਾ ਜ਼ਿਕਰ
ਬਿੱਟੂ ਨੇ ਕਿਹਾ, “ਇਹ ਉਹੀ ਵਿਅਕਤੀ ਹੈ, ਜਿਸ ਨੇ ਅੱਜ ਤੱਕ ਸਭ ਤੋਂ ਗੰਦੇ ਗੀਤ ਗਾਏ। ਜਿਸ ਚਮਕੀਲਾ ਨੇ ਪੰਜਾਬ ਦੀਆਂ ਧੀਆਂ-ਭੈਣਾਂ ਲਈ ਅਸ਼ਲੀਲ ਗੀਤ ਗਾਏ ਅਤੇ ਜਿਸ ਨੂੰ ਅੱਤਵਾਦੀਆਂ ਨੇ ਮਾਰਿਆ, ਉਸ ‘ਤੇ ਇਸ ਨੇ ਫ਼ਿਲਮ ਬਣਾਈ। ਜੇ ਇਸ ਨੂੰ ਸੱਚਮੁੱਚ ਧੀਆਂ-ਭੈਣਾਂ ਦੀ ਇੰਨੀ ਚਿੰਤਾ ਹੁੰਦੀ ਤਾਂ ਇਹ ਚਮਕੀਲਾ ‘ਤੇ ਫ਼ਿਲਮ ਕਦੇ ਨਾ ਬਣਾਉਂਦਾ।”
“OTT ਤੋਂ ਫ਼ਿਲਮ ਹਟਾਉਣਾ ਸਿਰਫ਼ ਪਬਲਿਸਿਟੀ ਸਟੰਟ”
ਬਿੱਟੂ ਨੇ ਕਿਹਾ ਕਿ ਫ਼ਿਲਮ ਨੂੰ OTT ਤੋਂ ਹਟਾਉਣਾ ਕਿਸੇ ਸਰਕਾਰੀ ਦਬਾਅ ਦਾ ਨਤੀਜਾ ਨਹੀਂ ਸੀ। ਉਨ੍ਹਾਂ ਦੇ ਮੁਤਾਬਕ, “ਜਦੋਂ 199 ਜਾਂ 399 ਰੁਪਏ ਵਾਲਾ ਟੀਚਾ ਪੂਰਾ ਹੋ ਗਿਆ ਤਾਂ ਪਬਲਿਸਿਟੀ ਲਈ ਕਿਹਾ ਗਿਆ ਕਿ ਫ਼ਿਲਮ ਹਟਾਈ ਜਾ ਰਹੀ ਹੈ। OTT ‘ਤੇ ਸਰਕਾਰ ਦਾ ਕੋਈ ਕੰਟਰੋਲ ਨਹੀਂ ਹੁੰਦਾ। ਇਹ ਜਦੋਂ ਚਾਹੁਣ ਫ਼ਿਲਮ ਲਾ ਸਕਦੇ ਹਨ। ਇਹ ਸਿਰਫ਼ ਡਰਾਮਾ ਹੈ।”
ਸ਼ਹੀਦ ਬੇਅੰਤ ਸਿੰਘ ਅਤੇ BJP ਬਾਰੇ ਕੀ ਕਿਹਾ?
ਬਿੱਟੂ ਨੇ ਕਿਹਾ, “ਜਦ ਤੱਕ ਸਰਦਾਰ ਬੇਅੰਤ ਸਿੰਘ ਮੁੱਖ ਮੰਤਰੀ ਰਹੇ, ਜਸਵੰਤ ਸਿੰਘ ਖਾਲੜਾ ‘ਤੇ ਨਾ ਕੋਈ ਕੇਸ ਦਰਜ ਹੋਇਆ ਅਤੇ ਨਾ ਹੀ ਪੁਲਿਸ ਨੇ ਉਨ੍ਹਾਂ ਨੂੰ ਕਦੇ ਬੁਲਾਇਆ। 31 ਅਗਸਤ ਨੂੰ ਬੇਅੰਤ ਸਿੰਘ ਸ਼ਹੀਦ ਹੋਏ ਅਤੇ ਉਸ ਤੋਂ ਬਾਅਦ 6 ਸਤੰਬਰ ਨੂੰ ਖਾਲੜਾ ਨੂੰ ਚੁੱਕਿਆ ਗਿਆ। ਇਸ ਲਈ ਬਿਨਾਂ ਜਾਣਕਾਰੀ ਦੇ ਬੇਅੰਤ ਸਿੰਘ ‘ਤੇ ਉਂਗਲ ਨਹੀਂ ਚੁੱਕਣੀ ਚਾਹੀਦੀ।”
ਆਪਣੀ ਹੀ ਪਾਰਟੀ BJP ਨੂੰ ਨਸੀਹਤ
ਰਵਨੀਤ ਬਿੱਟੂ ਨੇ ਪੰਜਾਬ BJP ਆਗੂਆਂ ਨੂੰ ਵੀ ਨਸੀਹਤ ਦਿੰਦਿਆਂ ਕਿਹਾ, “ਹਰ ਗੱਲ ‘ਤੇ ਬੈਕਫੁੱਟ ‘ਤੇ ਜਾਣ ਦੀ ਲੋੜ ਨਹੀਂ ਹੈ। 1980 ਤੋਂ 1995 ਤੱਕ ਪੰਜਾਬ ਵਿੱਚ ਜਾਂ ਤਾਂ ਕਾਂਗਰਸ ਦੀ ਸਰਕਾਰ ਸੀ ਜਾਂ ਗਵਰਨਰ ਰਾਜ ਸੀ। ਉਸ ਸਮੇਂ ਨਾ ਕੇਂਦਰ ਵਿੱਚ BJP ਸੀ ਅਤੇ ਨਾ ਹੀ ਪੰਜਾਬ ਵਿੱਚ। ਫਿਰ BJP ਨੂੰ ਸਫਾਈ ਦੇਣ ਦੀ ਕੀ ਲੋੜ ਹੈ? ਡਟ ਕੇ ਕਹੋ ਕਿ ਇਸ ਮਾਮਲੇ ਨਾਲ ਸਾਡਾ ਕੋਈ ਲੈਣਾ-ਦੇਣਾ ਨਹੀਂ ਹੈ।”
ਕਾਂਗਰਸ ‘ਚ ਪਏ ਪਾੜ ‘ਤੇ ਪਰਗਟ ਸਿੰਘ ਨੇ ਤੋੜੀ ਚੁੱਪੀ!
