ਪੰਜਾਬੀ ਗਾਇਕ ਅਤੇ ਅਦਾਕਾਰ ਪਰਮੀਸ਼ ਵਰਮਾ (Parmish Verma) ਇੱਕ ਵਾਰ ਫਿਰ ਵਿਵਾਦਾਂ ਵਿੱਚ ਘਿਰ ਗਏ ਹਨ। ਦਿੱਲੀ ਵਿੱਚ ਹੋਏ ਇੱਕ ਲਾਈਵ ਸ਼ੋਅ ਦੌਰਾਨ ਉਹ ਆਪਣੇ ਇੱਕ ਫੈਨ ਨਾਲ ਭਿੜ ਗਏ। ਗਾਣਾ ਗਾਉਂਦੇ ਹੋਏ ਉਹ ਅਚਾਨਕ ਰੁਕ ਗਏ ਅਤੇ ਮੰਚ ਤੋਂ ਉਸ ਫੈਨ ਵੱਲ ਇਸ਼ਾਰਾ ਕਰਦੇ ਹੋਏ ਥੱਪੜ ਦਿਖਾਉਣ ਲੱਗ ਪਏ। ਇਸ ਤੋਂ ਬਾਅਦ ਦੋਨਾਂ ਵਿਚਕਾਰ ਬਹਿਸ ਵਧ ਗਈ, ਜਿਸ ਕਾਰਨ ਮੌਕੇ ‘ਤੇ ਮੌਜੂਦ ਪੁਲਿਸ ਕਰਮਚਾਰੀਆਂ ਅਤੇ ਪਰਮੀਸ਼ ਵਰਮਾ ਦੇ ਪ੍ਰਾਈਵੇਟ ਸੁਰੱਖਿਆ ਗਾਰਡਾਂ ਨੂੰ ਵਿਚਕਾਰ ਦਖਲ ਦੇਣਾ ਪਿਆ।
ਇਸ ਘਟਨਾ ਦਾ ਵੀਡੀਓ ਹੁਣ ਸੋਸ਼ਲ ਮੀਡੀਆ ‘ਤੇ ਤੇਜ਼ੀ ਨਾਲ ਵਾਇਰਲ ਹੋ ਰਿਹਾ ਹੈ। ਵਾਇਰਲ ਵੀਡੀਓ ਵਿੱਚ ਪਰਮੀਸ਼ ਵਰਮਾ ਫੈਨ ਨਾਲ ਤਿੱਖੀ ਬਹਿਸ ਕਰਦੇ ਨਜ਼ਰ ਆ ਰਹੇ ਹਨ, ਹਾਲਾਂਕਿ ਆਵਾਜ਼ ਸਾਫ ਨਹੀਂ ਸੁਣਾਈ ਦਿੰਦੀ। ਦੱਸਿਆ ਜਾ ਰਿਹਾ ਹੈ ਕਿ ਇਹ ਬਹਿਸ ਇੱਕ ਮਿੰਟ ਤੋਂ ਵੱਧ ਸਮੇਂ ਤੱਕ ਚੱਲਦੀ ਰਹੀ, ਜਿਸ ਨਾਲ ਮੌਕੇ ‘ਤੇ ਹੰਗਾਮੇ ਵਰਗਾ ਮਾਹੌਲ ਬਣ ਗਿਆ।
ਜਾਣੋ ਕੀ ਹੈ ਪੂਰਾ ਮਾਮਲਾ…
ਪੰਜਾਬੀ ਗਾਇਕ ਪਰਮੀਸ਼ ਵਰਮਾ 13 ਫਰਵਰੀ ਦੀ ਸ਼ਾਮ ਦਿੱਲੀ ਦੇ ਛਤਰਸਾਲ ਸਟੇਡੀਅਮ (Chhatrasal Stadium) ਵਿੱਚ ‘ਦਿੱਲੀ ਖੇਲ ਮਹਾਕੁੰਭ’ ਦੇ ਉਦਘਾਟਨ ਸਮਾਗਮ ਦੌਰਾਨ ਲਾਈਵ ਪਰਫਾਰਮੈਂਸ ਦੇ ਰਹੇ ਸਨ। ਇਹ ਪ੍ਰੋਗਰਾਮ ਸ਼ਾਮ 5 ਵਜੇ ਸ਼ੁਰੂ ਹੋਇਆ ਸੀ ਅਤੇ ਦਾਖਲਾ ਮੁਫ਼ਤ ਰੱਖਿਆ ਗਿਆ ਸੀ, ਪਰ ਰਜਿਸਟ੍ਰੇਸ਼ਨ ਲਾਜ਼ਮੀ ਸੀ।
ਸ਼ੋਅ ਦੌਰਾਨ ਕਾਫ਼ੀ ਭੀੜ ਇਕੱਠੀ ਹੋ ਗਈ। ਜਦੋਂ ਪਰਮੀਸ਼ ਵਰਮਾ ਨੇ ਗਾਣਾ ਸ਼ੁਰੂ ਕੀਤਾ ਤਾਂ ਕਈ ਫੈਨਜ਼ ਬੈਰੀਕੇਡ ਤੋੜ ਕੇ ਮੰਚ ਦੇ ਨੇੜੇ ਪਹੁੰਚ ਗਏ। ਇਸ ਦੌਰਾਨ ਉਨ੍ਹਾਂ ਦੀ ਸੁਰੱਖਿਆ ਟੀਮ ਨਾਲ ਫੈਨਜ਼ ਦੀ ਬਹਿਸ ਹੋਈ ਅਤੇ ਧੱਕਾ-ਮੁੱਕੀ ਦੀ ਸਥਿਤੀ ਬਣ ਗਈ। ਕੁਝ ਫੈਨਜ਼ ਪਰਮੀਸ਼ ਵਰਮਾ ਨਾਲ ਸੈਲਫੀ ਲੈਣ ਦੀ ਜ਼ਿੱਦ ਵੀ ਕਰ ਰਹੇ ਸਨ, ਜਿਸ ਕਾਰਨ ਮਾਹੌਲ ਤਣਾਅ ਭਰਿਆ ਹੋ ਗਿਆ।
ਜਦੋਂ ਫੈਨਜ਼ ਮੰਚ ਵੱਲ ਵੱਧਣ ਲੱਗੇ ਤਾਂ ਗਾਇਕ ਪਰਮੀਸ਼ ਨੇ ਗਾਣਾ ਗਾਉਣਾ ਰੋਕ ਦਿੱਤਾ ਅਤੇ ਉਨ੍ਹਾਂ ਨੂੰ ਪਿੱਛੇ ਹਟਣ ਲਈ ਕਹਿਣ ਲੱਗ ਪਏ। ਇਸ ਦੌਰਾਨ ਇੱਕ ਫੈਨ ਵੱਲੋਂ ਉਨ੍ਹਾਂ ਬਾਰੇ ਗਲਤ ਟਿੱਪਣੀ ਕੀਤੀ ਗਈ। ਇਸ ਤੋਂ ਬਾਅਦ ਪਰਮੀਸ਼ ਵਰਮਾ ਨੇ ਉਸ ਫੈਨ ਵੱਲ ਇਸ਼ਾਰਾ ਕਰਦੇ ਹੋਏ ਥੱਪੜ ਦਿਖਾਇਆ ਅਤੇ ਹੋਰ ਲੋਕਾਂ ਨੂੰ ਵੀ ਪਿੱਛੇ ਹੋਣ ਲਈ ਕਿਹਾ।
ਇਸ ਘਟਨਾ ਤੋਂ ਬਾਅਦ ਕੁਝ ਫੈਨਜ਼ ਦੇ ਗਰੁੱਪ ਅਤੇ ਪਰਮੀਸ਼ ਵਿਚਕਾਰ ਬਹਿਸ ਤੇਜ਼ ਹੋ ਗਈ। ਪਰਮੀਸ਼ ਮੰਚ ਦੇ ਕਿਨਾਰੇ ਆ ਕੇ ਫੈਨਜ਼ ਨੂੰ ਹਟਣ ਲਈ ਕਹਿੰਦੇ ਨਜ਼ਰ ਆਏ, ਪਰ ਜਦੋਂ ਫੈਨਜ਼ ਨਾ ਮੰਨੇ ਤਾਂ ਉਹ ਗੁੱਸੇ ਵਿੱਚ ਦਿਖਾਈ ਦਿੱਤੇ। ਮਾਮਲਾ ਵੱਧਦਾ ਦੇਖ ਦਿੱਲੀ ਪੁਲਿਸ ਅਤੇ ਪਰਮੀਸ਼ ਦੇ ਪ੍ਰਾਈਵੇਟ ਸੁਰੱਖਿਆ ਗਾਰਡਾਂ ਨੇ ਵਿਚਕਾਰ ਆ ਕੇ ਸਥਿਤੀ ਨੂੰ ਕਾਬੂ ਕੀਤਾ ਅਤੇ ਮਾਹੌਲ ਸ਼ਾਂਤ ਕਰਵਾਇਆ।
ਹੋਰ ਪੜ੍ਹੋ
