Sugar Stock Limit : ਜੇਕਰ ਤੁਸੀਂ ਮਿਠਾਈ, ਬੇਕਰੀ, ਬਿਸਕੁਟ, ਕਨਫੈਕਸ਼ਨਰੀ ਜਾਂ ਸਾਫਟ ਡ੍ਰਿੰਕ ਦੇ ਕਾਰੋਬਾਰ ਨਾਲ ਜੁੜੇ ਹੋ ਤਾਂ ਇਹ ਖ਼ਬਰ ਤੁਹਾਡੇ ਲਈ ਬਹੁਤ ਜ਼ਰੂਰੀ ਹੈ। ਤਿਉਹਾਰਾਂ ਤੋਂ ਪਹਿਲਾਂ ਖੰਡ ਦੀ ਜਮਾਖੋਰੀ ਅਤੇ ਵਧਦੀਆਂ ਕੀਮਤਾਂ ’ਤੇ ਰੋਕ ਲਗਾਉਣ ਲਈ ਸਰਕਾਰ ਨੇ ਇੱਕ ਵੱਡਾ ਕਦਮ ਚੁੱਕਿਆ ਹੈ। ਹੁਣ ਜ਼ਿਆਦਾ ਮਾਤਰਾ ਵਿੱਚ ਖੰਡ ਦੀ ਵਰਤੋਂ ਕਰਨ ਵਾਲੇ ਵੱਡੇ ਕਾਰੋਬਾਰੀਆਂ ਲਈ ਤੈਅ ਹੱਦ ਤੋਂ ਵੱਧ ਖੰਡ ਸਟਾਕ ਕਰਕੇ ਰੱਖਣਾ ਮੁਸ਼ਕਲ ਹੋ ਸਕਦਾ ਹੈ। ਨਵੇਂ ਨਿਯਮ ਤਹਿਤ ਤੈਅ ਸੀਮਾ ਤੋਂ ਵੱਧ ਖੰਡ ਜਮ੍ਹਾਂ ਰੱਖਣ ’ਤੇ ਕਾਰਵਾਈ ਹੋ ਸਕਦੀ ਹੈ।
ਦਰਅਸਲ, ਅਗਸਤ ਤੋਂ ਨਵੰਬਰ ਦੇ ਵਿਚਕਾਰ ਗਣੇਸ਼ ਚਤੁਰਥੀ, ਦੁਸਹਿਰਾ ਅਤੇ ਦੀਵਾਲੀ ਵਰਗੇ ਤਿਉਹਾਰਾਂ ਕਾਰਨ ਖੰਡ ਦੀ ਮੰਗ ਕਾਫੀ ਤੇਜ਼ੀ ਨਾਲ ਵਧ ਜਾਂਦੀ ਹੈ। ਇਸ ਦੌਰਾਨ ਕਈ ਕਾਰੋਬਾਰੀ ਪਹਿਲਾਂ ਹੀ ਵੱਡੀ ਮਾਤਰਾ ਵਿੱਚ ਖੰਡ ਖਰੀਦ ਕੇ ਸਟਾਕ ਕਰ ਲੈਂਦੇ ਹਨ। ਸਰਕਾਰ ਨੇ ਇਸ ਨੂੰ ਦੇਖਦੇ ਹੋਏ ਵੱਡੇ ਖਰੀਦਦਾਰਾਂ ਲਈ ਸਟਾਕ ਰੱਖਣ ਦੀ ਮਿਆਦ ਘਟਾ ਕੇ ਹੁਣ 15 ਦਿਨ ਕਰ ਦਿੱਤੀ ਹੈ।
ਕਿੰਨੀ ਖੰਡ ਦਾ ਸਟਾਕ ਰੱਖ ਸਕਣਗੇ ਕਾਰੋਬਾਰੀ?
ਨਵੇਂ ਹੁਕਮ ਮੁਤਾਬਕ ਇਹ ਨਿਯਮ 1 ਸਤੰਬਰ ਤੋਂ 30 ਨਵੰਬਰ 2026 ਤੱਕ ਲਾਗੂ ਰਹੇਗਾ। ਹਾਲਾਂਕਿ, ਇਹ ਨਿਯਮ ਉਨ੍ਹਾਂ ਕਾਰੋਬਾਰੀਆਂ ਜਾਂ ਸੰਸਥਾਵਾਂ ’ਤੇ ਲਾਗੂ ਹੋਵੇਗਾ, ਜਿਨ੍ਹਾਂ ਦੀ ਹਰ ਮਹੀਨੇ ਖੰਡ ਦੀ ਖਪਤ 10 ਮੀਟ੍ਰਿਕ ਟਨ ਯਾਨੀ 100 ਕੁਇੰਟਲ ਤੋਂ ਵੱਧ ਹੈ। ਅਜਿਹੇ ਖਰੀਦਦਾਰ ਆਪਣੀ 15 ਦਿਨਾਂ ਦੀ ਲੋੜ ਤੋਂ ਵੱਧ ਖੰਡ ਸਟਾਕ ਵਿੱਚ ਨਹੀਂ ਰੱਖ ਸਕਣਗੇ।
ਕਿਹੜੇ ਕਾਰੋਬਾਰੀਆਂ ’ਤੇ ਲਾਗੂ ਹੋਵੇਗਾ ਨਿਯਮ?
ਵੱਡੇ ਹਲਵਾਈ ਅਤੇ ਮਿਠਾਈ ਵਿਕਰੇਤਾ
ਬੇਕਰੀ ਅਤੇ ਕਨਫੈਕਸ਼ਨਰੀ ਯੂਨਿਟ
ਸਾਫਟ ਡ੍ਰਿੰਕ ਬਣਾਉਣ ਵਾਲੀਆਂ ਕੰਪਨੀਆਂ
ਫੂਡ ਪ੍ਰੋਸੈਸਿੰਗ ਕੰਪਨੀਆਂ
ਹੋਰ ਵੱਡੇ ਥੋਕ ਖਪਤਕਾਰ
ਕੀ ਹੈ ਅਸਲ ਵਜ੍ਹਾ?
ਦਰਅਸਲ, ਸਰਕਾਰ ਨੇ ਇਸ ਤੋਂ ਪਹਿਲਾਂ ਕਾਰੋਬਾਰੀਆਂ ਲਈ ਖੰਡ ਦਾ ਸਟਾਕ ਰੱਖਣ ਦੀ ਤੈਅ ਹੱਦ 30 ਦਿਨ ਰੱਖੀ ਸੀ। ਪਰ ਕੀਮਤਾਂ ਵਿੱਚ ਤੇਜ਼ੀ ਜਾਰੀ ਰਹਿਣ ਤੋਂ ਬਾਅਦ ਹੁਣ ਇਸ ਹੱਦ ਨੂੰ ਘਟਾ ਕੇ 15 ਦਿਨ ਕਰ ਦਿੱਤਾ ਗਿਆ ਹੈ। ਕਿਉਂਕਿ ਤਿਉਹਾਰੀ ਸੀਜ਼ਨ ਵਿੱਚ ਖੰਡ ਦੀ ਮੰਗ ਅਚਾਨਕ ਵਧ ਜਾਂਦੀ ਹੈ ਅਤੇ ਇਸ ਦੌਰਾਨ ਬਿਸਕੁਟ, ਮਿਠਾਈ ਅਤੇ ਕਨਫੈਕਸ਼ਨਰੀ ਬਣਾਉਣ ਵਾਲੀਆਂ ਕੰਪਨੀਆਂ ਪਹਿਲਾਂ ਤੋਂ ਹੀ ਸਟਾਕ ਤਿਆਰ ਕਰ ਲੈਂਦੀਆਂ ਹਨ।
ਸਰਕਾਰ ਕਿਵੇਂ ਕਰੇਗੀ ਸਟਾਕ ਦੀ ਨਿਗਰਾਨੀ?
ਸਰਕਾਰ ਇਹ ਪਤਾ ਲਗਾਉਣ ਲਈ ਖਰੀਦਦਾਰਾਂ ਦੀ ਖੰਡ ਖਰੀਦ ਅਤੇ ਖਪਤ ਨਾਲ ਸਬੰਧਤ ਅੰਕੜਿਆਂ ਦਾ ਮਿਲਾਨ ਕਰੇਗੀ। ਇਸ ਲਈ ਖੰਡ ਮਿੱਲਾਂ ਵੱਲੋਂ ਵੱਡੇ ਖਰੀਦਦਾਰਾਂ ਨੂੰ ਕੀਤੀ ਗਈ ਵਿਕਰੀ ਅਤੇ ਕਾਰੋਬਾਰੀਆਂ ਦੇ GST ਰਿਟਰਨ ਵਿੱਚ ਦਰਜ ਜਾਣਕਾਰੀ ਦੀ ਵਰਤੋਂ ਕੀਤੀ ਜਾਵੇਗੀ।
ਖੰਡ ਨਾਲ ਸਬੰਧਤ HSN ਕੋਡ ਦੀ ਜਾਣਕਾਰੀ ਚੈੱਕ ਕੀਤੀ ਜਾਵੇਗੀ।
ਖੰਡ ਮਿੱਲਾਂ ਤੋਂ ਹੋਈ ਵਿਕਰੀ ਦਾ ਰਿਕਾਰਡ ਵੀ ਚੈੱਕ ਕੀਤਾ ਜਾਵੇਗਾ।
ਖਰੀਦਦਾਰ ਨੇ ਕਿੰਨੀ ਖੰਡ ਖਰੀਦੀ ਅਤੇ ਉਸ ਦੀ ਖਪਤ ਕਿੰਨੀ ਹੈ, ਇਸ ਦਾ ਵੀ ਪਤਾ ਲਗਾਇਆ ਜਾਵੇਗਾ।
ਇਸੇ ਡਾਟਾ ਦੇ ਆਧਾਰ ’ਤੇ ਸਰਕਾਰ ਲੋੜ ਤੋਂ ਵੱਧ ਖੰਡ ਦਾ ਸਟਾਕ ਰੱਖਣ ਵਾਲੇ ਕਾਰੋਬਾਰੀਆਂ ’ਤੇ ਨਜ਼ਰ ਰੱਖੇਗੀ।
